आज बिहान बिहानै यो समाचार सुन्न पाउँदा निकै खुसी लाग्यो ।
काठमाण्डौंबाहिर बस्ने जो कोहीलाई थानकोटको उकालो र नौबिसेको ओरालो “नखाऊँ भने दिनभरिको शिकार, खाऊँ भने कान्छा बाउको अनुहार” भने जस्तो सामना नगरी धरै नपाइने अवरोध हो । यसको वैकल्पिक रुपमा सुरुङ बन्न सक्यो भने देश र जनतालाई फाइदै फाइदा छ ।
- समय जोगिन्छ ।
- दुर्घटनाहरू कम हुन्छन् ।
- जामहरूको दुखबाट राहत हुन्छ ।
- इन्धन खर्च कम लाग्छ । र सम्भवत यात्रा शुल्क पनि कम हुन्छ ।
- ढुवानी खर्च कम लाग्ने हुनाले काठमाण्डौंबासीको लागि सामान सस्तो पर्न जाक्छ ।
- बेनीघाटसम्म र त्यस आसपासका ठाउँहरू सुगम हुन्छन् । जसले गर्दा काठमाण्डौंको चाप कम हुन्छ ।
- सुरुङप्रविधि भित्रिएपछि अन्य सुरुङहरूको पनि बहस बढ्नेछ ।
- नेपाली इन्जिनियरहरूको लागि सिक्ने र शीपको सदुपयोग गर्ने सुवर्ण अवसर हुनेछ ।
- धेरैलाई रोजगारी मिल्नेछ ।
जापानले नेपाल र नेपालीहरूलाई धेरै गुन लगाइसकेको छ । यदि यो प्रोजेक्ट सफल गर्यो बने नेपालीहरूले कहिल्यै नभुल्ने र भुल्न नसकिने गुन हुनेछ ।
समाचारको विस्तृत अंश:
जापानले थानकोट सुरुङमार्ग बनाउन सघाउने – कुबेर चालिसे
काठमाडौं : जापान सरकारले थानकोटमा सुरुङमार्ग बनाउन सघाउने भएको छ। नेपालका लागि जापानी राजदूत मासासी ओगावाले तीनकु नेस्थित अन्नपूर्ण पोस्ट्को कार्यालयमा पत्रकारसँग कुरा गर्दै जापान सरकारले त्रिभुवन राजमार्गमा हालको अव्यवस्थतालाई सुरुङमार्गले सहज बनाउन मद्दत गर्ने विश्वास पनि व्यक्त गरे।
देशभित्र तथा बाहिरको सवारी आवागमनमा मात्र होइन अर्थतन्त्रको पनि मेरुदण्डको रूपमा रहेको त्रिभुवन राजमार्गको थानकोटखण्डको अस्तव्यस्थताले यात्रुले कष्ट उठाउनुपरेको छ। त्रिभुवन राजपथ काठमाडौंलाई बाँकी देशसँग जोड्ने सबैभन्दा सहज राजमार्ग हो। यो राजमार्गको प्रयोग गरेर दैनिक हजारौं यात्रु काठमाडौं आवतजावत मात्र गर्दैनन्, दैनिक उपभोग्य सामान एवं देशको महत्त्वपूर्ण व्यापारको ठूलो मात्रा यो राजमार्गबाटै भित्रिन्छ र बाहिरिन्छ।
‘जापान सरकार नेपाली जनताको सहज आवागमनको लागि थानकोटमा २.३ किलोमिटरको सुरुङमार्ग निर्माणमा सहयोग गर्न चाहन्छ’, उनले भने, ‘जापान सरकारसँग अत्याधुनिक प्र्रविधि भएकोले जापान प्रविधि हस्तान्तरण गर्न चाहन्छ।’
अघिल्लो साता भौतिक पूर्वाधार तथा यातायात मन्त्रालयका सचिव तुल्सीप्रसाद सिटौलाको नेतृत्वमा नेपाली टोली सुरुङमार्गका लागि प्राविधिक र सैद्धान्तिक ज्ञान हासिल गर्न आठ सदस्यीय टोली जापान पनि गएको थियो। नेपाल सरकारले एक वर्षअगाडि नागढुंगा सडकखण्डमा सुरु ङमार्ग बनाउने विषयमा अध्ययन गरेको थियो। यसबाट २.३ किमि लामो सुरुङ नागढुंगाको इमाखेलदेखि नौबीसेको सिस्नेखोलासम्म बनाउने निर्णय भएको थियो।
यस आयोजनाले मूर्तरूप लिएमा नेपालको सुरुङमार्ग यातायात क्षेत्रमा ठूलो सहयोग पुग्ने र भविष्यमा पनि अन्य सुरुङमार्गको लागि बाटो खुल्नेछ।
यसैगरी, राजदूत ओगावाले जापानले नेपालको पूर्वाधारको विकासमा मद्दत गरिरहेको र अझ मद्दत गर्ने चाहना भएको पनि बताए। ‘बनेपा-बर्दिबास बीपी राजमार्ग आगामी मार्च महिनामा सम्पन्न हुने बताउँदै उनले यो राजमार्गले काठमाडौंदेखि तराईको दूरी मात्र छोट्ट्याएको होइन त्यसभेगका कृषकको कृषिजन्य उत्पादनले बजार पनि पाउने र उनीहरूको जीवनस्तरमा सुधार आउने पनि उनले बताए।
६ महिनाअघि मात्र नेपाल आएका राजदूत ओगावाले शान्तिपूर्ण दोस्रो संविधानसभाको चुनाउको माध्यमबाट नयाँ सरकार बनेको र नेपालमा समयमा नै संविधान आउनेमा विश्वस्त हुँदै धेरै जापानीहरू नेपालीको बारेमा अझै परिचित नभएको तर नेपाल आउन चाहेको पनि बताए। ‘जापानले नेपालको जनशक्तिको विकासमा पनि मद्दत गरिरहेको छ’, उनले भने, ‘तर जिट्कोमा केही समस्या आएको भए पनि राजदूतावासले त्यसलाई सहजीकरण गर्न मद्दत गर्ने कोसिस गर्नेछ।’
उक्त अवसरमा अन्नपूर्ण पोस्ट्को प्रकाशन संस्था थ्रीएनआईका अध्यक्ष रामेश्वर थापाले राजदूतलाई स्वागत गर्दै थ्रीएनआईले प्रजातन्त्र र अर्थतन्त्रको विकासमा जोड दिने बताए।
Src : Annapurna Post